EKSPERT ELMAR NURƏLİYEV: "Tonqala bu kimi materiallar atılarsa…”
Bildiyimiz kimi mart ayı bayramlar ayıdır. Ən gözəl adətlərimizdən biri də Novruz bayramından əvvəl “Su, od, yel və torpaq” çərşənbələrinin olmasıdır. Doğrudur, insanlar bu çərşənbələrdə tonqal yandırıb şənlənirlər. Ancaq bu ənənənin təhlükəli tərəfi də qaçılmazdır.
Bu Bununla bağlı Fövqəladə Hallar Nazirliyi yanğın təhlükəsizliyi qaydalarına dair əhaliyə təkrar müraciət edib. Müraciətdə deyilir ki, çərşənbə axşamları təşkil olunan zaman yanğın təhlükəsizliyi qaydaları pozularsa, təhlükəli vəziyyət yaranar.
Mövzu ilə bağlı Adalet.az-a açıqlama verən Təhlükəsizlik eksperti Elmar Nurəliyev yanğın təhlükəsizliyi qaydalarına hər kəsin əməl etməsinin vacib olduğunu bildirib: “Tonqal qalanan ərazidə ən az 15 metr məsafədə tez alışan əşyalar və ya maddələr olmamalıdır. Nəqliyyat vasitələrinin yaxınlığında, yüksək gərginlikli elektrik xətlərinin keçdiyi ərazilərdə tonqal qalamaq qətiyyən olmaz. Yer səthinə metal lövhə qoyulmalı, onun üzərində qalamaq lazımdır. Bu onun üçündür ki, asfalt örtük korlanmasın və yerdə qalan qığılcımlar ətrafa səpələnməsin. Tonqalın maksimum hündürlüyü 1 metr 50 santimetri keçməməlidir. Yalnız ocağın tam söndüyünə əmin olduqdan sonra məkanı tərk etmək olar”.
Ekspert qeyd edib ki, tonqal yanan zaman uşaqları nəzarətsiz buraxmaq olmaz: “Uşaqlar valideyn nəzarəti altında olmalıdır. Tonqal ətrafında fişənglərdən istifadə etmək olmaz. Tonqalın içərisinə metal, tənəkə, şüşə, konserv qabları, rezin və s. bu kimi materiallar atılarsa, tonqal ətrafında dayanın insanların həyatı üçün təhülkə yarana bilər”.
Əntiqə Kərimzadə
adalet.az
neymar.az