Ölkəmizdəki ticarət mərkəzlərində təhlükəsizlik hansı səviyyədədir? – Elmar Nurəliyev

Xəbər verdiyimiz kimi, Moskvada “Crocus City Hall” konsert zalında dəhşətli terror aktı baş verib. Rusiya Fövqəladə Hallar Nazirliyinin son məlumatlarına görə, “Crocus City Hall”da törədilən terror aktı nəticəsində 143 nəfər həlak olub.

Sözügedən hadisə Azərbaycanda da təhlükəsizlik məsələsini gündəmə gətirib. Xüsusilə, ticarət mərkəzləri və insanların sıx toplaşdığı yerlərdə göstərilən təhlükəsizlik xidmətlərinin səviyyəsi insanları düşündürür.

Bəs maraqlıdır, bizdə vəziyyət nə yerdədir?

Təhlükəsizlik məsələləri üzrə ekspert Elmar Nurəliyev mövzu ilə bağlı Bizim.Media-ya açıqlama verib.

O bildirib ki, Azərbaycanda təhlükəsizliklə bağlı hər hansı bir narahatlığa ehtiyac yoxdur: 

“Əlbəttə ki, güc strukturları tərəfindən təhlükəsizliyin təmin olunması yüksək səviyyədə həyata keçirilir. Bunun bariz nümunəsi kimi, illərdir Azərbaycanda nüfuzlu, beynəlxalq tədbirlərin, müsabiqələrin, idman yarışlarının keçirilməsini qeyd edə bilərik. Bu il də Azərbaycanda böyük bir tədbir (COP 29) keçiriləcək. Bunlar təhlükəsizliyin yüksək səviyyədə olmasının göstəricisidir. Bu da ölkə başçısının iradəsi və güc strukturlarının, hüquq-mühafizə orqanlarının səyi nəticəsində reallaşır. Hətta dünyanın nüfuzlu şirkətlərinin, qurumlarının, təşkilatlarının təhlükəsiz hesab olunan ölkələr siyahısında Azərbaycan da üst sırada yer alır”. 

Ekspert Elmar Nurəliyev əlavə edib ki, dövlət bu məsələdə uğurlu olsa da, müxtəlif təyinatlı obyektlər, eləcə də vətəndaşlarımız diqqətli olmalıdır:

“Onlar bu məsələdə daha fəal iştirak etməlidirlər. İnsanlar qarşılarına çıxan, baş verə biləcək, şübhə doğuran yeni hallar olarsa, şübhəli əşyalara rast gələrlərsə, aidiyyəti üzrə məlumat verməlidirlər. Belə olan halda vətəndaşlar hüquq-mühafizə orqanlarını məlumatlandırmalıdırlar. Daha çox insanın cəmləşdiyi məkanlarda - ticarət mərkəzləri, konsert zalları, ictimai iaşə müəssisələri və parklarda təhlükəsizlik məsələsi ön planda olmalıdır. 

Girişdə insanların vizual olaraq yoxlanmasından, nəzarət müşahidə kameraları vasitəsilərinin reydlərindən tutmuş obyektin fiziki qorunmasına qədər proses diqqətdə saxlanmalıdır. Kompleks yanaşma olan tədbirlər planı da olmalıdır”. 

Ekspert onu da vurğulayıb ki, bütün təyinatlı obyektlərdə mühafizəçilərin bilik və bacarıqlarının yüksək səviyyədə olmasını, mütəmadi olaraq təlimatlandırmadan keçməsini, təlim kurslarına cəlb olunmasını, hər bir obyektin təhlükəsizlik riskinin qiymətləndirilməsini düzgün həyata keçirmək lazımdır:

Obyektdə hansı təhlükələr ola bilər? 

“Məsələn, bir ticarət mərkəzində yanğın, soyğunçuluq, təhdid, təbii fəlakət, fövqəladə və təbiət hadisəsi ola bilər. Təhlükəsizlik əməkdaşları bilməlidir ki, bu anda nə etməlidirlər, necə davranmalıdırlar, məlumatı necə ötürməlidirlər, vətəndaşları hansı yolla təxliyə etməlidirlər. İl ərzində ən azı iki dəfə bu cür təlimlər təşkil edilməlidir. Çünki bu hadisələrdən heç kim 100 faiz sığortalanmayıb. 
Təhlükə risklərinə qarşı hazırlıqlı olmaqla bu kimi hadisələrdən minimal zərərlə qurtulmaq olar. Pis niyyətli insanlar birinci növbədə özlərinə hədəf seçirlər, həmin yeri müəyyənləşdirirlər. Müəyyənləşdirdikdən sonra isə boşluqları axtarırlar, dəfələrlə baxış keçirirlər. Öz çirkin planlarını belə qururlar. Ona görə də mühafizə sistemində boşluq gördükləri yeri hədəfə alırlar”. 

Məhərrəm Əliyev, Bizim.Media

neymar.az

0.068188905715942