Hər il yay mövsümü gələndə eyni acı mənzərə təkrarlanır: rəsmi xəbərdarlıqlara, qadağan olunmuş ərazilərin siyahısının elan edilməsinə baxmayaraq, vətəndaşlar təhlükəli çimərliklərə axın edirlər. Bəs bu inadkarlığın qarşısını necə almaq olar? Cərimələr çıxış yoludurmu?

Mövzu ilə bağlı News365.az-a  təhlükəsizlik üzrə ekspert Elmar Nurəliyev sosial məsuliyyətsizliyin və qayda pozuntularının pərdəarxası tərəflərini tam çılpaqlığı ilə ifşa edib.

Qadağan Olunmuş Çimərlik Niyə Təhlükəlidir? (Görünməyən Səbəblər)

Ekspert bildirir ki, bir çimərliyə "icazə yoxdur" deyirlərsə, bu, sadəcə inzibati bir qərar deyil. Mövsüm başlamazdan əvvəl müvafiq qurumlar tərəfindən sahil xəttində ciddi yoxlamalar aparılır:

• Bakterioloji təhlükə: Suyun fiziki, kimyəvi və bakteroloji tərkibi yoxlanılır, sağlamlıq riskləri analiz edilir.

• Sualtı tələlər: Suyun dibinin akvatoriya xüsusiyyətləri, qəfil dərinləşən sualtı yarğanlar və axınlar müəyyən olunur.

Xilasedicisi və nəzarəti olmayan bu cür ərazilərə daxil olmaq, birmənalı olaraq intihara bərabərdir.

Həyat Qurtaran "5 Qızıl Qayda"

Elmar Nurəliyev dəniz kənarında istirahət edənlər üçün mütləq riayət olunmalı olan ölüm-dirim qaydalarını açıqlayıb:

1. Küləkli havada dənizə girməyin: Küləyin sürəti saniyədə 10-12 metri keçirsə, dalğalarla mübarizə aparmaq qeyri-mümkündür.

2. Üzmə sərhədlərini (buyları) keçməyin: Sərhədi aşmaq həm xilasedicilərin görünüş məsafəsindən çıxmaq, həm də boğulma riskini pikə çatdırmaq deməkdir.

3. Spirtli içki və dəniz – ölümcül kombinasiya: Alkoqolun təsiri altında suya girmək reaksiyanı tamamilə sıfırlayır.

4. Nəzarətsiz ərazilərdən uzaq durun: Xilasetmə postu olmayan yerdə sizə heç kim kömək edə bilməyəcək.

5. Uşaqları bir saniyə belə baxımsız qoymayın: Valideynlərin əyləncəyə qapılması çox vaxt faciə ilə bitir.

Dəhşətli Dünya Statistikası: Qurbanların 95%-i Eyni Səhvi Edir

Ekspert dünyada hər il yaşanan çimərlik faciələrinin qorxulu statistikasını da diqqətə çatdırıb:

"Hər il dünyada 400 minə yaxın insan suda boğularaq həyatını itirir. Ən dəhşətlisi odur ki, bu ölüm hallarının 95 faizi məhz nəzarətsiz və qadağan olunmuş çimərliklərin payına düşür. Suda boğulmaların 70 faizinin səbəbi isə əlverişsiz hava şəraitinə məhəl qoymamaqdır".

Bu rəqəmlər bir daha sübüt edir ki, dəniz qayda pozuntularını və səhlənkarlığı bağışlamır. İstirahətin faciəyə çevrilməməsi üçün çimərlik seçimini planlı və şüurlu şəkildə etmək hər bir vətəndaşın öz əlindədir.

news365.az

neymar.az